{*tit_cineuropa}

Cineuropa 2011: XXV edición

Vinte e cinco anos imprimen carácter. Novembro xa é, para os amantes do cinema en Compostela e, aínda máis, en Galicia, o tempo de Cineuropa. Unha programación que goza dun público ávido de coñecer eses títulos que brillaron ao longo nos festivais internacionais máis relevantes, en Berlín, Sundance, Bos Aires, Cannes, Locarno, Venecia ou Donostia. Un novembro máis, e van vinte e cinco, agardamos que en Compostela se faga a luz para ese cinema do que tanto oímos falar: títulos como O cabalo de Torino, que arrasou en Berlín. As películas máis controvertidas e celebradas de Cannes: L’Apollonide, Guilty of romance, The Artist , Hors Satan. Os aínda recentes León de Ouro de Venecia, Fausto, e a Concha de Ouro en Donostia, Los pasos dobles. Os autores máis arriscados, os que atraeron os focos de 2011 pola forza das súas imaxes: Bruno Dumont, Bertrand Bonello, Bela Tarr, Sion Sono, Aleksander Sokurov…

E ao lado deses títulos e directores máis rechamantes, a posibilidade de mergullar nos máis de 130 filmes que o equipo de programación de Cineuropa foi pescando en augas internacionais. O mellor do cinema latinoamericano, asiático e, en xeral, da produción independente.
Compostela é a única cidade do Estado onde se pode ver, agrupada, toda esa colleita do mellor cinema chegado de todo o mundo. E Cineuropa, coa súa fórmula contrastada, converte a Santiago en capital do cinema e xa é patrimonio cultural desta cidade.

Benvida, Cineuropa. E, como vinte e cinco anos son algo máis ca nada, nesta ocasión o festival ofrécenos regalos senlleiros: un concerto no que a música de Shostakovich, interpretada pola Real Filharmonía, se funde coas imaxes de A nova Babilonia no Auditorio de Galicia. E outro recital, coa fasquía do ganador dun Óscar, Jorge Drexler, que lle porá, por un día, pausa á pantalla do Principal.

Os nosos premios Cineuropa desta XXV edición serán para unha actriz poderosa que foi inesquecible Regenta e mesmo duquesa de Alba premiada cunha Concha de Ouro: Aitana Sánchez-Gijón, que pisou hai xa algúns anos o escenario do Principal, daquela no papel de Maggie, a gata sobre o tellado de zinc quente, e que na inauguración do festival recibirá a calor que merece a súa carreira sen concesións ao éxito fácil. E para Drexler, o cuarto Óscar que recibe o Premio do festival. Dámosvos a benvida desde Cineuropa, nestas vodas de prata coa cidade, co seu público, coa pantalla revivificada.