{*tit_cineuropa}

Director: Miguel Gomes

Un verán coma outros, na portuguesa Arganil. Hai procesións relixiosas, mozos que acampan, veciños simpáticos e fogos artificiais que alternan con bandas de música popular e con situacións como a do director dunha película -a que estamos a ver- que ve ameazada a continuidade da rodaxe e os esbozos de conflitos e atraccións entre algúns dos integrantes das bandas.

Pero dun xeito imperceptible, a un tempo máxico e mítico, esa aparencia «documental» vaise esvaecendo para deixar asomar a contracara que merece, o seu complemento de espesor «ficcional», e as cancións xa deixan de sucederse no seu carácter festivo para empezar a iluminar un triángulo amoroso melodramático.

A extrema orixinalidade de Aquele querido mês de agosto non está só no xeito complexísimo co que Gomes filma o simple e o banal, nin na notable singularidade para facer converxer accións ou diálogos ou personaxes simultáneos nun mesmo plano, senón no modo en que volve indiscernible a fronteira entre o real e o ficcional, así, sen comiñas que os distingan. Unha película única que nos fai pensar en moitas películas e situacións da vida, diferenciándose de todas.

Ficha artística:

• Intérpretes: Sónia Bandeira, Fábio Oliveira, Joaquim Carvalho.

Ficha técnica:

• Guión: Miguel Gomes, Mariana Ricardo e Telmo Churro.
• Produción: Luís Urbano, Sandro Aguilar e Thomas Ordonneau.
• Fotografía: Rui Poças.
• Montaxe: Telmo Churro e Miguel Gomes.

Datos técnicos:

• Título orixinal: Aquele querido mês de agosto.
• Países: Portugal.
• Ano: 2008.
• Duración: 147 minutos.